ഹൃദയത്തില് നിന്നും
ഉതിര്ന്നു വീഴുന്നൊരീ
വാക്കിന്റെ ചോരയാണെന് കവിത...
അനുഭവത്തിന്റെ
സൂര്യാതപം നീറ്റുന്ന
വേനല്ച്ചിരാതെന്റെ കവിത...
സങ്കല്പ്പമേഘങ്ങള്
പെയ്തുപാറുന്നൊരീ
മഴനീര്പ്പിറാവെന്റെ കവിത...
ആത്മരോഷത്തിന്റെ
മൂര്ച്ചയില് രാകുന്ന
ഖഡ്ഗങ്ങളാണെന്റെ കവിത...!
ഓര്മ്മകള് പൂവിട്ട
പൂവാംകുരുന്നില;
ബാല്യകാലത്തിന്റെ
ചീയാത്ത പൂമണം...
മുതല മട, കടലിനല
പുഴ തൊടും കടവിലെ
ഓളങ്ങളാണെന്റെ കവിത...
നൊമ്പരങ്ങള് ചരല്-
ക്കല്ലുകള് പാകിയ
നാട്ടുവഴി; വേര്പ്പിന്റെ
മണമുള്ള പാടം
നെന്മണികള് നന്മയുടെ
തേന് തുള്ളികള്
ആ പഴമ തിരയുന്നതെന് കവിത...
മൌനങ്ങള് വേടന്റെ-
യമ്പായ് തറഞ്ഞ
പ്രാകുറുകലില്
ചിറകറ്റ പ്രാണന്റെ യീണം
കോണ്ക്രീറ്റു കാടുകള്;
പുനര്ജന്മമറിയുന്ന
വേടക്കിരാതര്
ആ നേരു ചികയുന്നതെന് കവിത....
എന്നിലെയെന്നെഞാന്
തുന്നുന്ന തൂവാല
എന്നില് നിന്നെന്നെ ഞാന്
കോര്ക്കുന്ന മാല
എന്നിലേക്കെന്നെ ഞാന്
നോക്കുന്ന ജാലകമാണെന്റെ കവിത.....!!
.........
No comments:
Post a Comment